మహమ్మారి కరోనాను జయించిన ఆ నవ దంపతులపై విధి కన్నెర్ర

1 min read

మహమ్మారి కరోనాను జయించిన ఆ నవ దంపతులపై విధి కన్నెర్ర జేసింది. గుర్తుతెలియని వాహనం రూపంలో వారిని బలితీసుకుంది. పెళ్లయిన ఆరు నెలలకే నిండు నూరేళ్లు నిండేలా చేసింది. గర్భిణి అయిన భార్యను కష్టం లేకుండా చూసుకోవాలన్న అతని తపన, పండంటి బిడ్డను కని భర్తకు కానుక ఇవ్వాలన్న ఆమె కోరికలను చిదిమేసింది.

విజయనగరం జిల్లా పూసపాటిరేగ మండలంలో ఈ విషాద ఘటన చోటుచేసుకుంది.
శ్రీకాకుళం జిల్లా ఆమదాలవలస మండలం చిట్టివలసకు చెందిన రౌతు యోగేశ్వరరావు(27), రోహిణి(22) దంపతులు సోమవారం బైక్‌పై విశఖపట్నం వెళ్తుండగా గుర్తుతెలియని వాహనం ఢీకొంది. ఈ ఘటనలో దంపతులిద్దరూ అక్కడికక్కడే ప్రాణాలు విడిచారు. రైల్వేలో కళాసీగా పనిచేసే యోగేశ్వరరావు నిత్యం రైల్లోనే ఇంటి నుంచి పనికి వెళ్లొచ్చేవాడు. అయితే రోజూ అంతదూరం రాకపోకలు సాగించడం కష్టంగా మారడంతో రెండు నెలల క్రితమే కంచరపాలెంలో ఇల్లు అద్దెకు తీసుకుని భార్యతో అక్కడ కాపురం పెట్టాడు.
నరసన్నపేటకు చెందిన రోహిణిది ఏడేళ్ల క్రితం తండ్రిని కోల్పోయింది. యోగేశ్వరరావు తండ్రి మూడేళ్ల క్రితం మృతి చెందడంతో ఇద్దరూ నాన్న ప్రేమకు దూరమయ్యారు. పెళ్లయ్యాక దాంపత్య జీవితం సాఫీగా సాగుతున్న తరుణంలో కరోనా సోకడంతో ఇద్దరూ ఇంట్లోనే ఉండి క్రమం తప్పకుండా మందులు వాడి కోలుకున్నారు. భార్య రోహిణి నీరసంగా ఉందని చెప్పడంతో చిట్టివలసలో తల్లి వద్ద ఉంచాడు. రెండు రోజుల క్రితమే భార్య గర్భిణి అని తెలిసి యోగేశ్వరరావు చాలా సంతోషించాడు. దగ్గరుండి బాగా చూసుకోవాలన్న ఉద్దేశంతో విశాఖపట్నం తీసుకెళ్లాలని నిర్ణయించుకున్నాడు.
కొద్ది రోజులు అక్కడే ఉంచి ఆసుపత్రిలో చూపించి, వారంలో తిరిగి వస్తానమ్మా అంటూ తల్లికి చెప్పి భార్యతో కలిసి బైక్‌పై విశాఖపట్నం బయలుదేరాడు.
కనిమెట్ట పైవంతెన వద్దకు వచ్చేసరికి వెనుక నుంచి ఓ గుర్తు తెలియని వాహనం వీరిని ఢీకొట్టి వెళ్లిపోయింది. దీంతో అదుపుతప్పిన బైక్ డివైడర్‌ను బైక్‌ బలంగా ఢీకొనడంతో ఇద్దరూ తీవ్రగాయాలతో చనిపోయారు. ఈ విషయం తెలుసుకున్న కుటుంసభ్యులు, బంధువులు సంఘటనా స్థలానికి చేరుకుని కన్నీరుమున్నీరుగా విలపించారు. పోలీసులు ఇద్దరి మృతదేహాలను పోస్టుమార్టం నిమిత్తం సుందరపేట సామాజిక ఆసుపత్రికి తరలించారు. ఈ ఘటనపై కేసు నమోదు చేసి దర్యాప్తు చేస్తునట్లు పూసపాటిరేగ పోలీసులు తెలిపారు.

Total Page Visits: 96 - Today Page Visits: 1

Leave a Reply

Your email address will not be published. Required fields are marked *

You may have missed